🥭 आंबा पिकतो, रस गळतो 🥭 मॅंगो हाॅलिडेज देणार ग्राहकांना रद्द झालेल्या सहलींचा संपूर्ण परतावा.

मॅंगो हाॅलिडेज देणार ग्राहकांना रद्द झालेल्या सहलींचा संपूर्ण परतावा

मुंबई ग्राहक पंचायतीच्या कायदेशीर लढाईचे यश

मॅंगो हाॅलिडेजने अखेर मुंबई ग्राहक पंचायतीने केलेल्या तक्रारीवरील केंद्रीय ग्राहक संरक्षण प्राधिकरणाच्या (CCPAच्या) आदेशाची पूर्तता करण्याचे ठरवून करोना काळातील त्यांच्या रद्द झालेल्या सहलींचा संपूर्ण परतावा ( व्हिसा फी आणि विमा प्रिमियम वगळून) पर्यटकांना देण्याची तयारी केली असल्याचे समजते. त्यातील काही ग्राहकांनी त्यांना नुकताच असा प्रत्यक्ष परतावा मिळाल्याचेही आपल्याला कळवले असून त्याबद्दल मुंबई ग्राहक पंचायतीचे आभारही मानले आहेत.

करोना काळातील लाॅकडाऊन मुळे रद्द झालेल्या देश-विदेशच्या पर्यटन सहलींचा परतावा देण्यास नकार देणार्या वीणा वर्ल्ड, केसरी टूर्स, मॅंगो हाॅलिडेज अशा काही आघाडीच्या पर्यटन कंपन्यांविरुद्ध मुंबई ग्राहक पंचायतीने केंद्रीय ग्राहक संरक्षण प्राधिकरणाकडे तक्रारी दाखल करुन या ग्राहकांना त्यांच्या भरलेल्या रकमांचा संपूर्ण परतावा मिळण्याची मागणी केली होती.

या पैकी मॅंगो हाॅलिडेज या कंपनीची मुंबई जिल्हाधिकाऱ्यांमार्फत रीतसर चौकशी करुन परतावा देण्यास नकार देणे किंवा परतावा देताना सहल रद्द झाल्याचे शुल्क आकारणे ही कायद्यातील “अनुचित व्यापारी प्रथा” ठरते हा मुंबई ग्राहक पंचायतीचा मुद्दा ग्राहक प्राधिकरणाने मान्य करुन मॅंगो हाॅलिडेजची ती अट रद्दबातल करत असल्याचे घोषित केले. तसेच कंपनीने परतावा मागणार्या सर्व ग्राहकांना त्यांनी भरलेल्या संपूर्ण रकमांचा परतावा, तीस दिवसांच्या आत कोणत्याही प्रकारचे सहल रद्द झाल्याचे शुल्क न आकारता, देण्याचा आदेशही पारीत केला होता. शिवाय ज्या ग्राहकांना असे शुल्क वजा करुन‌ कंपनीने यापूर्वी परतावा दिला असेल त्या सर्व ग्राहकांनासुद्धा ते वजा केलेले शुल्क परत करण्याचे आदेश ग्राहक प्राधिकरणाने २५ नोव्हेंबर २०२२ रोजी दिले होते. या निर्णयाविरुद्ध मॅंगो हाॅलिडेजने मुंबई उच्च न्यायालयातही धाव घेतली होती. परंतू काही कारणांनी मॅंगो हाॅलिडेजने आता CCPA च्या आदेशाची अखेर पूर्तता करण्याचे ठरवल्याचे दिसतंय. काहीही असो, मॅंगो हाॅलिडेजच्या या “ग्राहक सुखाय” कृतीचे स्वागतच आहे.

शिरीष देशपांडे
कार्याध्यक्ष