💐 पहिला वहिला समेट 💐

मुंबई ग्राहक पंचायतीने घोषित केलेल्या “समेट” या आपल्या नव्या तक्रार निवारण व्यासपीठावरील पहिलीच तक्रार दोन्ही बाजूंनी परस्पर समजूतदारपणाने विक्रमी वेळात सोडवली आहे.

श्री व सौ गोळवलकर या तक्रारदार पालकांनी (तक्रारदारांचे खरे नाव बदलले आहे) आपल्या अमेरिकेत शिकत असलेल्या मुलीला ४ ऑक्टोबर २०२२ला दिवाळीसाठीचा फराळ एका खाजगी कंपनीमार्फत पाठवला होता. सात – आठ दिवसांत हा फराळ लेकीला पोहचवला जाईल असं या कंपनीने गोळवलकरांना आश्वस्त केले होते. या व्यवहारासाठी गोळवलकरांनी त्या कंपनीला २३ हजार रुपये भरले. परंतू दिवाळी उलटुन गेली तरी हा फराळ अमेरिकेतील लेकीला मिळालाच नाही.

वारंवार पाठपुरावा केल्यानंतर गोळवलकरांना कळले की भारतातील या कंपनीने कायद्यानुसार आवश्यक असे FSSAI चे प्रमाणपत्र आणि अन्य काही कागदपत्रांची पूर्तताच केली नव्हती. त्यामुळे अखेर तो फराळ अमेरिका वारी करुन मायदेशी तसाच परत आला आणि तोही तब्बल दोन महिन्यांनंतर!

त्यामुळे गोळवलकरांनी प्रथम National Consumer Helpline (NCH) कडे तक्रार दाखल करुन त्यांनी भरलेल्या २३ हजार रुपयांचा परतावा मागितला. इतकेच नाही तर परतावा देऊ शकत नसाल तर पुन्हा पार्सल पाठवायचे असेल तेंव्हा ही रक्कम वापरण्याची तयारी कंपनीने दाखवली तरीसुद्धा चालेल इतकी माफक अपेक्षा गोळवलकरांनी व्यक्त केली. परंतू या कंपनीच्या संचालकांनी गोळवलकरांची इतकी वाजवी मागणी सुद्धा धुडकावून लावली.

त्यामुळे NCH द्वारे तक्रार निवारण न झाल्याने गोळवलकरांनी आपल्या तक्रार मार्गदर्शन केंद्राच्या ज्येष्ठ मार्गदर्शिका शर्मिला रानडे यांच्याशी संपर्क साधला. शर्मिला रानडे यांनी सर्व तक्रार नीट समजावून घेतल्यावर त्यांना आपल्या “समेट” या व्यासपीठाद्वारे तक्रार निवारणाचा मार्ग समजावून सांगितला.

त्यानुसार गोळवलकरांनी आपला आवश्यक तो अर्ज “समेट” प्रबंधक अॅड. पूजा जोशी-देशपांडे यांना online सादर केला. सदर अर्ज त्या कंपनीच्या संचालकांना ५ एप्रिलला पाठवून तक्रारदार कोणत्याही न्यायालयात न जाता मुंबई ग्राहक पंचायतीच्या “समेट” या व्यासपीठा द्वारे सलोख्याने ( through Conciliation) हा तंटा सोडवू इच्छित आहेत असे पूजाने कळवले आणि त्यासाठी सलोखाकार (Conciliator) नेमण्यासाठी त्यांची संमती मागवली.‌ आणि अहो आश्चर्यम्! NCHद्वारे तक्रार पाठविल्यावर सुद्धा ती सोडवण्यास ठाम नकार देणार्या कंपनीच्या संचालकाने मुंबई ग्राहक पंचायतीच्या “समेट”ची नोटीस जाताच ४८ तासातच आपण संपूर्ण २३ हजारांची रक्कम तक्रारदाराच्या बॅंक खात्यात जमा करण्यास तयार असल्याचे सांगून गोळवलकरांच्या बॅंक खात्याचा तपशील मागवला‌. त्यावर पूजाने पुन्हा दोन्ही बाजूंना ई-मेल पाठवून हा समझौता मान्य असल्याचे कळवण्यास सांगितले. दरम्यान गोळवलकरांनी बॅंकेचा तपशील त्या कंपनी संचालकांना पाठवताच त्यांनी त्यानंतर सहा तासांच्या अवधीत २३ हजार रुपये त्यांच्या बॅंक खात्यात जमा केल्याचा पुरावाच काल १० एप्रिलला आपल्याला सादर केला आणि अशा रितीने “समेट” व्यासपीठावर आलेल्या पहिल्याच तक्रारीचे शीघ्र गतीने, सलोखाकार नेमण्या आधीच सामंजस्याने अवघ्या सहा दिवसांत निवारण झाले.

गोळवलकरांनी मुंबई ग्राहक पंचायतीचे याबाबत खास आभार मानले असून संस्थेच्या योग्य मार्गदर्शन आणि पाठिंब्यामुळेच त्यांना त्यांची रक्कम इतक्या जलद गतीने मिळू शकली असे काल रात्री कळवले आहे.

शर्मिला आणि पूजा दोघींचे “समेट” च्या पहिल्याच शीघ्र आणि यशस्वी तक्रार निवारणाबद्दल मनापासून अभिनंदन.‌ 💐💐

शिरीष देशपांडे
११.०४.२०२३